讓我們一起認識香港的海洋生物吧！
此活動由漁農自然護理署資助
在此刊物上／任何的項目活動內表達的任何意見、研究成果、結論或建議，並不一定反映香港特別行政區政府的觀點。
織錦芋螺
依隻螺係咪好靚顏色好鮮艷呢？但芋螺其實係著名嘅有毒螺類黎，如果喺海灘上或海底見到佢嘅話...... 除咗讚嘆佢好靚之外，記得千祈千祈千祈唔好掂佢呀！因為美麗嘅外表下，佢哋可伸出長吻將非常強烈嘅神經毒素經魚叉狀齒舌刺入獵物身體入面，其毒性係足以毒死魚類甚至人類添架，所以佢哋絕對可以話係香港海洋界入面最毒嘅動物之一！
玉足海參
唔好睇玉足海參其貌不揚咁，但其實佢係香港水域常見海參品種之一，喺水底生態仲有個好重要嘅角色 - 就係平衡物質嘅循環喇！
另外，受刺激時玉足海參會由肛門排出一啲叫「居維氏管」嘅白色黏性物質 ，依啲物質係佢哋嘅內臟黎架，主要功用係纏住敵人並分散其注意力。逃脫後，佢哋體內就會重新生出失去咗嘅「居維氏管」，可以話係為逃避敵人無所不用其技。不過留意返，其實要重新生出依啲物質都好花能量，所以喺野外見到佢哋嘅話千祈唔好貪好玩亂搞佢哋呀！
刺冠海膽
刺冠海膽的棘剌尖銳而細長，粗細長短不一。佢哋最大嘅特徵就係有個明顯橙黃色，成隻眼仔咁嘅圓形物體！不過其實呢個半透明球狀並唔係眼，而係佢地嘅排泄殖腔。
雖然刺冠海膽睇落好多刺好嚇人咁，但原來佢哋嘅刺為體型較小的蝦、蟹或幼魚提供躲藏空間，對維持海洋生物多樣性好有貢獻㗎！不過都係要提提大家，比佢哋啲刺 拮到嘅話真喺唔係講笑㗎，所以如果喺海中見到佢哋嘅話記得「眼看手勿動」喇！
紫海膽
唔知大家對紫海膽有咩認識呢？呈紫黑色嘅海膽外貌雖然唔太特別，但原來佢以好味出名架！海膽可能好多人都好鍾意食，但大家又知唔知我哋平時食海膽果時見到果啲金黃色嘅物體究竟係海膽邊部份呢？唔講可能都唔會留意，果啲係佢哋肥滿嘅生殖線黎架！
雜色角孔海膽
海膽大多以海藻為食，而最大嘅特徵就係擁有帶刺嘅硬殼。唔同嘅海膽品種唔單止會顏色唔同，刺嘅粗幼、長短、甚至距離都會有啲唔同架！而今日要介紹嘅依隻雜色角孔海膽，佢哋就好鍾意收集嘅小小嘅「飾物」黎裝飾表面以作偽裝。小石頭、貝殼或者海藻碎都係佢哋嘅心頭好黎架！
巴布亞硝水母
巴布亞硝水母係香港常見嘅水母之一，佢哋半透明嘅身體上面有好多白色或者淡黃色嘅斑點架！而且佢哋多數嘅個體都係藍綠色或者橄欖綠色嘅～ 點解會咁？因為原來佢哋好似珊瑚一樣，體內都有共生嘅蟲黃藻。
溫提：水母的觸手上分佈著稠密嘅刺細胞，當我哋觸碰佢哋果陣，刺細胞內嘅毒素就會被釋放出黎！所以大家無論喺海入面潛緊水定喺海灘上玩緊果時見到佢哋，都記得要互相尊重眼看手勿動，咁就大家開心大家都安全啦！
阿拉伯寶螺
嘩呢隻螺個殼上面咁多字嘅？睇真啲，原來只係佢背部嘅花紋比較複雜，睇落好似阿拉伯文咁，所以佢就得到「阿拉伯寶螺」呢個名喇~ 佢係香港常見嘅品種，鍾意食藻類，由潮間帶至淺水岩礁底海域都有機會搵到佢哋㗎。佢哋鍾意匿埋係石珊瑚嘅空隙或者石塊下面，要揾佢哋就唔好錯過啲窿窿罅罅喇！
斑砂海星
斑砂海星係大型海星，直徑可達30厘米！但唔好以為佢哋咁大隻就好容易搵到佢哋喎，因為佢哋成日都會匿埋係沙地入面，要搵到佢哋都幾考眼力架~ 雖然佢英文名叫eight-armed starfish，但原來佢可以有7至9隻腕足，只係一般嚟講8隻係最常見嘅~ 另外，佢地其實係好活躍嘅肉食性動物黎架，會捕食其他無脊椎動物甚至係其他棘皮動物。
關刀
又名「馬夫魚」，身體有兩條黑色寬帶，而最特別嘅地方係佢背鰭後方有條明顯嘅延長！佢哋主要食浮游生物同埋底棲嘅無脊椎動物，而喺香港我哋通常可以喺珊瑚群落或石礁附近搵到佢哋，佢哋會單獨、一對、又或者一小群咁出現添架！
海蛞蝓
海蛞蝓喺「腹足綱」中嘅一群，同螺類係親戚黎架。不過由於佢哋無殼，所以為左保護自己，佢哋會用鮮艷嘅外表去警告其他海洋生物不要隨便向自己動手。佢哋亦以海綿、藻類、海葵等為食，仲可以將依啲食物轉化成化學防禦例如分泌毒素或會干擾敵人嘅汁液等，來對付自己嘅捕食者繼而嚇退其他捕獵者。某啲海蛞蝓甚至可以喺進食海葵、水母或其他刺細胞動物後「偷取」刺細胞，之後再將儲埋嘅刺細胞擺喺背脊到保護自己，真係好高招！
樸蝴蝶魚
樸蝴蝶魚外表上最有特徵嘅相信都係佢哋果3條橙棕色嘅垂直寬帶，以及背鰭後方嘅大黑點。咁靚嘅樸蝴蝶魚其實係香港數量最多嘅蝴蝶魚之一黎架，喺香港通常可以喺淺礫區搵到佢哋嘅蹤影，下次大家有機會落海玩嘅時候都不妨留意下啦！
鉛點多紀魨
又名「黃雞泡」，就係我哋平時講嘅雞泡魚嘅其中一種。佢哋背脊有好多不規則嘅斑點架，而腹部就係偏白或者黃色嘅～大家對雞泡魚嘅印象可能好多時都係佢哋喺受威脅或驚嚇時，吹脹自己果個樣，但其實佢哋平時個樣就喺好似圖中咁。叫得做雞泡魚，佢哋都係有河豚毒素架！河豚毒素係一種強烈嘅神經毒素，無論係人定其他海洋生物，如果進食分分鐘會致命！而喺日本嘅河豚師傅需要好小心咁切走晒所以河豚有毒嘅部份，先可以端出河豚比客人享用嘅～ 佢哋全部都要經過嚴格訓練同埋考牌先可以負責依道料理架，有機會嘅話你又夠唔夠膽試下呢？！
扁腦珊瑚屬
石珊瑚屬於「六放珊瑚亞綱」，佢哋嘅珊瑚蟲觸手數目為六或其倍數，而且有堅硬嘅碳酸鈣骨骼。扁腦珊瑚係其中一種香港最常見嘅石珊瑚，佢哋嘅珊瑚杯呈溝回形，睇落就好似腦袋咁，所以就被稱為扁腦珊瑚喇~ 扁腦珊瑚屬通常以大型嘅團塊形生長形態出現，群體嘅高度可達1米或以上！但唔好睇少佢哋嘅生長速度比較緩慢喎，佢哋都有特別嘅生存之道㗎！面對住激烈嘅空間競爭，扁腦珊瑚會伸出長長嘅觸手(sweeper tentacles)去攻擊其他珊瑚，以達到「霸地盤」嘅目的，都真係幾惡㗎！
鹿角珊瑚屬
鹿角珊瑚屬 Staghorn coral (𝘈𝘤𝘳𝘰𝘱𝘰𝘳𝘢)
鹿角珊瑚都係其中一種香港最常見嘅石珊瑚~ 大家咁聰明，見到佢個名應該都可以好快就聯想到佢個樣喇！香港水域錄得嘅鹿角珊瑚入面，都有唔同嘅生長形態，包括分枝形及桌形，係香港生長得最快的珊瑚品種之一！而第一批由我哋團隊利用珊瑚有性繁殖培育出黎嘅隆起鹿角珊瑚(𝘈𝘤𝘳𝘰𝘱𝘳𝘰𝘳𝘢 𝘵𝘶𝘮𝘪𝘥𝘢)，今年已經七歲，有成14厘米咁大架喇！生得快生得高就可以霸多啲位，亦可以更容易比陽光照到~ 咁樣同石珊瑚有共生關係嘅蟲黃藻就可以有效地進行光合作用，為珊瑚提供食物，並促進珊瑚健康地成長。
黑珊瑚
黑珊瑚同石珊瑚一樣都係屬於「六放珊瑚亞綱」，但有別於石珊瑚，黑珊瑚嘅珊瑚蟲並唔能夠伸縮。另外，明明黑珊瑚睇落係白色或者淺黃色，咁點解會叫做黑珊瑚呢？原來係因為佢有黑色嘅中軸骨骼，而我哋驟眼見到嘅黃、白色原來係表面嘅珊瑚蟲嘅顏色黎架～ 個感覺就好似我哋人平時望上去係肉色，但啲骨骼其實係白色嘅。另外，黑珊瑚有唔同嘅生長形態，但喺香港最常見嘅就有鞭狀同分枝狀。
軟珊瑚
軟珊瑚屬於「八放珊瑚亞綱」，佢哋嘅珊瑚蟲有八隻羽狀觸手，而且佢哋同石珊瑚唔同，並無明顯嘅鈣質骨骼。相反，佢哋身體就係由一種針狀的骨針同柔軟嘅組織組成嘅。一般而言，我哋會喺香港較深、水流較強嘅水域搵到軟珊瑚，而佢哋同石珊瑚唔同，佢哋主要會利用觸手過濾同進食水入面嘅微生物，例如微細浮游植物、原生動物等。
十字牡丹珊瑚
十字牡丹珊瑚係香港常見嘅石珊瑚之一。佢嘅生長形態呈板層形，由多塊直立而且堅硬嘅珊瑚板塊互相交錯而成。依種生長方法令板塊中間形成好多遮蔽嘅空間，為唔少珊瑚魚同無脊椎動物提供左一個舒適嘅棲息之所。另外，十字牡丹珊瑚十分適應淺水嘅生長環境，而喺海下灣海岸公園就可以搵到香港其中一片最大嘅十字牡丹珊瑚床，大家下次有機會都可以去睇下架～
豆豉蝶
又名「鏡斑蝴蝶魚」。佢哋黃色嘅身體上面有一條垂直貫穿眼部嘅黑色寬帶，背脊更加有一塊好明顯嘅黑斑。佢哋主要以珊瑚蟲及其他無脊椎動物為食物。另外，由於佢哋同珊瑚有緊密關係，故係其中一種顯示珊瑚健康狀況嘅指標物種黎架！而我哋團隊最近就好開心咁發現到佢哋住左喺我哋啲移植回歸赤門海峽復育點嘅鹿角珊瑚到呀！實在係一個振奮人心嘅好消息！
赤點石斑魚
又名「香港紅斑」，身體上有紅至橙色嘅斑點，身體兩側亦有機會有淡色嘅垂直寬帶。而另一特別嘅地方就係佢哋背脊有塊大黑斑。同其他斑一樣，佢哋出世時都係雌性，而當長大成熟或長至某大小果時，就有機會變成雄性架。佢哋喺六十年代嘅香港屬於常見品種，但依家數量就已經少左好多（哭），而喺國際自然保護聯盟瀕危物種紅色名錄 (IUCN Red List) 入面，佢哋已被列為「瀕危」(Endangered) 物種，如果大家唔加緊保護佢哋，佢哋有機會好快就會絕種架喇⋯⋯
油𩺬
如果潛開水嘅朋友就可能會知道，油𩺬攻擊力強而且牙齒尖利，如果潛水時見到都應該遠離。雖然佢哋個樣睇上黎唔太好惹，又成日張開口好似隨時準備去攻擊我哋咁，但原來佢哋咁樣做只因佢哋無鰓蓋(operculum)，為左呼吸佢哋先需要成日口擘擘咁等海水可以進出個鰓。其實一般黎講，只要我哋唔好去攻擊或威脅佢哋嘅話，海洋生物好少會無故攻擊我哋嘅～ 所以大家以後唔好誤會油𩺬喇～ 另外，佢哋作為肉食性動物以及海洋中嘅高階消費者，對維持生態系統，尤其係珊瑚群落或珊瑚礁生態，非常重要。
克氏雙鋸魚
佢就係我哋平時成日聽到嘅「小丑魚」！不過呢，大家留意返，雖然好多人可能都會誤會左，但香港搵到嘅克氏雙鋸魚同某動畫主角果條mo仔原來... 並唔屬於同一個小丑魚品種架！如果仔細啲睇下克氏雙鋸魚身上嘅顏色同花紋，就會發現佢哋身體係偏橙至黑色，而且會有3條白色垂直嘅寬紋嘅～另外唔講唔知，原來所有小丑魚出世果時都係雄性黎架，而當適當環境來臨時，例如當佢哋所在群體內唯一嘅雌性魚死亡或消失時，群體內第二大嘅雄性魚就會改變性別變成雌性魚並成為領袖去帶領個群體架喇～真係好神奇啊～ 但咁講法嘅話，心水清嘅朋友就可能已經諗到一樣野，就係動畫入面mo仔嘅爸爸，其實應該會變成「媽媽」先啱⋯⋯ （天啊好複雜⋯⋯）
魷魚
魷魚屬於「頭足類」嘅動物，意思就係佢哋有明顯嘅頭部同腕足部，另外墨魚同八爪魚同係同一類嘅動物黎架。佢哋全部都係肉食性動物，而且都可以噴出墨汁混淆敵人。唔知大家有無留意呢，我哋平日成日講嘅係夜晚去嘅「Chok墨魚」活動，其實釣上黎果啲⋯ 全部都係魷魚黎架！雖然驟眼睇佢哋個樣好似，但其實佢哋都有好同唔同嘅地方架！其中最唔同嘅可能就係佢哋嘅外表形態喇。魷魚本身較修長，體內有透明嘅「烏賊筆」。相反，墨魚則較闊身同厚身，體內嘅「墨魚骨」係白色嘅。咁以後大家再去「Chok墨魚」果陣就識得分啦！
墨魚
上一則貼文就提到，雖然魷魚同墨魚同魷魚都同屬「頭足類」動物，但佢哋仲有好多唔同嘅特別之處架！例如佢哋隻眼嘅瞳孔都好唔一樣架，魷魚隻眼係圓形嘅，而墨魚就係「W」形架，大家睇下兩張圖就可以比較到～另外，雖然魷魚活動非常靈活，但由於墨魚只能用身旁膜狀嘅鰭黎游水，所以佢哋相對魷魚就活動得慢少少㗎～