赤門海珊瑚探索之旅
此活動由漁農自然護理署資助
在此刊物上／任何的項目活動內表達的任何意見、研究成果、結論或建議，並不一定反映香港特別行政區政府的觀點。
乜嘢係珊瑚？
珊瑚就成日聽，但你又對佢哋有幾多了解呢？唔好睇佢哋郁都唔郁有時又成舊石頭咁，其實珊瑚係動物嚟㗎，仲係水母嘅親戚，同屬刺細胞動物門嘅成員！既然叫得做同門，佢哋當然有相似嘅地方啦，原來珊瑚同水母一樣都有刺細胞，作為捕食、攻擊及防衞用途㗎，所以以後大家唔好誤會佢哋係石頭喇！
咁究竟咩係珊瑚蟲？
珊瑚蟲其實係珊瑚嘅最基本個體嚟㗎！當我哋近睇一舊珊瑚嘅表面，就會如圖中一樣見到好多個圈圈，佢哋就係一隻隻嘅珊瑚蟲喇！所以話呢，平時見到一舊舊嘅珊瑚其實係好多隻珊瑚蟲聚居而成嘅群體，珊瑚嘅世界真係好熱鬧呢～
而且珊瑚蟲嘅結構好簡單㗎咋，每隻珊瑚蟲中間都有一個口部，用嚟進食同排泄。而圍住個口嘅就係佢哋嘅觸手喇，你又估唔估到觸手有咩作用呢？原來佢哋會利用觸手嚟捉嘢食，部份珊瑚品種更會利用觸手去攻擊其他珊瑚或生物以爭取生存空間添㗎！不過珊瑚大部分都會喺夜間時間先會伸出觸手嘅，所以並唔係時時都會見到佢哋啲觸手㗎。
平時成日聽嘅珊瑚群體又係點形成嘅呢？
珊瑚可進行無性繁殖。一隻珊瑚蟲會透過無性繁殖，產生更多珊瑚蟲，便慢慢形成由一個個珊瑚蟲個體相互連結嘅一個珊瑚群體。
不過，並唔係所有珊瑚都會如此生長，少數珊瑚品種只會以一隻珊瑚蟲的形式獨自生存。
珊瑚嘅分類
珊瑚係泛指具有碳酸鈣骨骼或者骨針嘅刺細胞動物，但「珊瑚」呢個名其實係統稱，香港常見嘅珊瑚涵蓋石珊瑚、黑珊瑚、軟珊瑚同柳珊瑚等，佢哋各有唔同嘅特徵同生長形態㗎！點分佢哋？
原來我哋可以按觸手數目將珊瑚分做兩大類嘅～如果珊瑚蟲有6或6嘅倍數觸手數目嘅就屬於「六放珊瑚亞綱」，咁你又估唔估到「八放珊瑚亞綱」嘅珊瑚蟲有幾多隻觸手呢？無錯！佢哋嘅觸手數目係⋯⋯ 8隻（但唔係8嘅倍數喎～）！
珊瑚嘅唔同形態
珊瑚除咗靚之外，其實佢哋喺海洋生態系統入面都扮演緊一個好重要嘅角色，絕對唔係淨係得個樣㗎！珊瑚唔同形狀嘅結構，為海床提供屋企俾唔同嘅海洋生物棲息，從而孕育出豐富嘅海洋生物多樣性！ 耳熟能詳嘅海洋生物例如蝴蝶魚、海馬、石斑魚、鸚嘴魚等等等等，佢哋都同珊瑚有著密不可分嘅關係！
香港邊度有石珊瑚？
香港東面及東北面水域擁有覆蓋率最高同品種最多樣嘅珊瑚群落，好似東平洲、海下灣、橋咀、甕缸呢啲地方，珊瑚覆蓋率可以高達八成㗎！而喺香港水域內生長嘅珊瑚入面，就以石珊瑚嘅品種數量最多，有84種咁多呀！
喺香港嘅南面甚至東南面，包括果洲群島、宋崗、橫瀾、鶴咀、南丫島、長洲同大嶼山等，都有機會搵到石珊瑚㗎，不過珊瑚覆蓋率同物種多樣性就相對地低喇～
喺圖中黃色嘅吐露港以及赤門海峽範圍，都有唔少零散嘅珊瑚個體，而入面嘅燈洲同扯𢃇排更係香港中文大學 - 珊瑚學院 - 嘅重點珊瑚修復點添。
吐露港珊瑚歷史
跟據資料顯示，1980年代初嗰陣，位於赤門海峽嘅燈洲同扯𢃇排曾經有高達70-80%珊瑚覆蓋率㗎！但後來隨住新市鎮發展及其帶嚟嘅水質污染，珊瑚生態就開始遭到嚴重破壞。雖然後來政府啟動咗「吐露港行動計劃」，令水質改善返好多，但可惜嘅係之後15年間，當地嘅珊瑚群落都未能自然恢復。自然恢復唔到嘅原因可能係因為當地嘅珊瑚數量已經太少，導致難以利用有性繁殖生產更多珊瑚，加上赤門海峽屬於一個受遮蔽嘅海灣，有限嘅海水交換亦無法增加嗰度嘅珊瑚幼蟲，所以當地嘅珊瑚群落咁多年嚟都未能自行恢復。
所以話呢，破壞生態環境真係好容易，但要修復卻係非常困難。
想知更多？睇下呢份文獻：
Wong KT, Chui APY, Lam EKY and Ang PO (2018) A 30-year monitoring of changes in coral community structure following anthropogenic disturbances in Tolo Harbour and Channel, Hong Kong. Marine Pollution Bulletin 133:900-910
珊瑚好重要㗎咩？
既然赤門海峽嘅珊瑚群落受破壞後無法自行恢復，咁人為嘅珊瑚修復就係時候大派用場！但喺探討有咩人為嘅珊瑚修復方法之前，等我哋又一齊諗下另一個更重要嘅問題：究竟點解我哋要修復被破壞珊瑚群落呢？珊瑚有咁重要嗎？
唔講可能唔為意，原來健康嘅珊瑚礁/群落的確對我哋人類好！重！要！因為佢哋會為其他生物以及人類帶來各種禮物（又稱為「生態系統服務」）。例如健康嘅珊瑚會為各種海洋生物提供棲息、繁衍同覓食嘅地方；為我哋帶嚟海鮮和藥物；以及生態旅遊等經濟效益，更為藝術創作提供咗唔少美學靈感；而珊瑚礁亦會為海岸提供保護，抵擋風浪侵害！
珊瑚食乜㗎？
珊瑚嘅營養來源主要靠兩個途徑，除咗下圖所講，利用由蟲黃藻進行光合作用提供嘅能量外，珊瑚亦會用觸手自己捕捉食物㗎！
無錯，原來大部份石珊瑚身體入面都有一種叫做「蟲黃藻」嘅單細胞藻類同佢哋共生嘅～珊瑚除咗提供安全舒適嘅居所比蟲黃藻，作為交換，蟲黃藻會利用珊瑚代謝產生的廢物，藉由光合作用，轉化為食物能量提供比珊瑚，呢個實在係一個效率好高嘅生產系統呀！除此以外，蟲黃藻仲係珊瑚嘅顏色來源呢！
但原來單靠蟲黃藻提供嘅食物，並唔足以滿足珊瑚所有嘅營養需求，所以一有機會，佢哋亦會用觸手去捕捉海中嘅浮游生物食㗎～
香港珊瑚有咩事？
上一回提過，大部份石珊瑚身體入面都有一種叫做「蟲黃藻」嘅單細胞藻類同佢哋共生，並會提供營養比佢哋。但原來珊瑚同蟲黃藻嘅共生關係好容易會因為外來環境嘅種種因素而失效㗎！例如唔適合嘅水溫、鹽度、酸鹼度、水質等等，都有機會打破呢種平衡關係，令蟲黃藻離開珊瑚。
無咗蟲黃藻嘅珊瑚唔單止會因為無足夠食物而要長期餓住個肚， 更會好似圖中珊瑚咁無咗蟲黃藻嘅顏色，繼而露出底部白色嘅骨骼，依個就係我哋成日都聽到嘅「珊瑚白化」現象喇。
現時，由全球氣候改變以及氣溫上升亦引發珊瑚白化現象，而事實上，香港珊瑚偶然都會喺冬天或夏天出現白化，但好彩嘅係受影響珊瑚大部份都係個別群體，而且亦唔太嚴重，一般都可以自行恢復嘅～
香港珊瑚有咩事？
健康嘅珊瑚對其他海洋生物以及人類都有著重要嘅地位，但事實上，珊瑚喺大海入面都面對住唔少問題，時刻挑戰著佢哋嘅生存！
珊瑚生長需要附著係喺堅固嘅基質上面，但由於香港適合珊瑚生長嘅基質並唔多，所以佢哋就要同其他珊瑚以及底棲生物競爭生存空間！
香港珊瑚有咩事？
珊瑚除咗需要同唔同生物競爭生存空間外，原來海洋中亦有好多動物，例如核果螺、某啲蝴蝶魚同海蛞蝓都會食珊瑚㗎！
而當中長刺海膽嘅侵食，更加會令到珊瑚底部結構變得不穩，一旦有颱風吹襲，珊瑚就會經唔起大浪而倒塌⋯⋯ 但係唔係海膽嘅錯呢？
以長刺海膽為例，由於佢哋本身食海藻，而藻類就係其中一種同珊瑚競爭生存空間嘅一大對手，所以海膽嘅存在原本對珊瑚嚟講好重要㗎！可惜嘅係，由於生態失衡，海膽嘅數量先會太幅急升，繼而影響珊瑚。所以話，唔止珊瑚，其實好多嘅海洋生物都面臨人類活動以及生態失衡嘅影響。
海洋垃圾對珊瑚有咩影響？
海洋垃圾泛指所有出現喺大海或海岸環境中出現嘅各種非天然物件，由於大部份垃圾都要好多年先可以分解，導致依啲垃圾會長期留喺海洋入面！
咁海洋垃圾又會對珊瑚產生咩問題？棄置嘅漁具會纏繞或折斷珊瑚，令佢哋受傷和感染。其實垃圾如膠袋亦會覆蓋珊瑚，令佢哋接觸唔到陽光，無咗陽光珊瑚內嘅蟲黃藻就無法進行光合作用，長期落去就有機會餓死珊瑚。
咁嘅話，大家又可以做啲咩嚟幫手保育珊瑚以及海洋呢？一啲好簡單嘅日常習慣如少啲用膠袋、膠餐具、膠飲管以及其他即棄膠製品等，可減少日常生活中製造出嚟嘅垃圾。大家亦可以自行組織海岸清潔活動同埋向親朋好友宣揚海洋保育訊息等等。
不如就由今日起，由一個小習慣開始，一齊諗吓自己可以點幫手保護我哋嘅海洋啦！